ភ្នំពេញ៖ ក្រុមហ៊ុន អ័រគីដេ ឌីវែឡុបម៉ិន និង ក្រុមហ៊ុន រ៉ូយ៉ាល់គ្រុប បានចុះកិច្ចព្រមព្រៀងអនុសារណៈយោគយល់គ្នា ជាមួយនឹងក្រុមហ៊ុន អ័រគីដេ ឌីវែឡុបម៉ិន ដើម្បីបង្កើតសាខាថ្មីនៃសាលារៀនអន្តរជាតិសៅប្រ៊ីដកម្ពុជា នៅលើទឹកដីទីក្រុងអ័រគីដេ ដឹប៊ូតានិចស៊ីធី នៃតំបន់ជ្រោយចង្វារ ដោយនាំយកកម្មវិធីសិក្សាស្តង់ដារពិភពលោក ពីចក្រភពអង់គ្លេសមកជូនដល់សិស្សានុសិស្ស។

កិច្ចចុះកុងត្រានេះធ្វើឡើងរវាងប្រធានក្រុមប្រឹក្សាភិបាលនៃក្រុមហ៊ុន អ័រគីដេ ឌីវែឡុបម៉ិន លោកស្រី ហ៊ុន ម៉ាណា និង ប្រធានក្រុមហ៊ុន រ៉ូយ៉ាល់គ្រុបឧកញ្ញ៉ា គិត ម៉េង នៅថ្ងៃទី៧ ខែមេសា ឆ្នាំ ២០២៣នេះ។

លោកស្រី ហ៊ុន ម៉ាណា បានលើកឡើងថា៖ «ថ្ងៃនេះនាងខ្ញុំពិតជាមានក្តីរីករាយក្នុងនាមជាប្រធានក្រុមប្រឹក្សាភិបាលនៃក្រុមហ៊ុន អ័រគីដេ ឌីវែឡុបម៉ិន ដែលបានចុះកុងត្រាជាមួយអ្នកឧកញ៉ា គិត ម៉េង ប្រធានក្រុមហ៊ុន រ៉ូយ៉ាល់គ្រុប ក្នុងការបង្កើតសាលារៀនអន្តរជាតិ SISC លើទឹកដីទីក្រុងអ័រគីដេ ដឹប៊ូតានិចស៉ីធី ជ្រោយចង្វា ដោយនាំយកកម្មវិធីសិក្សាស្តង់ដារពិភពលោក ពីចក្រភពអង់គ្លេស»។

លោកស្រី ហ៊ុន ម៉ាណា គូសបញ្ជាក់ថា នេះជាជំហានថ្មីមួយទៀត ដែលនឹងផ្តល់នូវអត្ថប្រយោជន៍ដ៏សំខាន់សម្រាប់ពលរដ្ឋរស់នៅក្នុងតំបន់ខណ្ឌជ្រោយចង្វារ ជាពិសេសអ្នកដែលរស់នៅក្នុងគម្រោងលំនៅដ្ឋាន ទីក្រុងអ័រគីដេ ដឹប៊ូតានិចស៊ីធី និងក្បែរៗគម្រោងទីក្រុងដ៏ធំមួយនេះ តាមបណ្តោយផ្លូវជាតិ ៦A។

គួរឱ្យដឹងដែរថា សាលារៀនអន្តរជាតិSouthBridge ស្ថិតក្រោមការគ្រប់គ្រង និងដំណើរការដោយក្រុមហ៊ុន រ៉ូយ៉ាល់គ្រុប ខណៈសាខាទី២ដែលត្រៀមបង្កើតនេះគឺត្រូវបានចុះកុងត្រាជាមួយក្រុមហ៊ុន អ័រគីដេ ឌីវែឡុបម៉ិន៕